Nagalawig sang sobra anum ka bulan ang pag-develop ni Charles Templonuevo sang KoroAr, isa ka mobile augmented reality museum nga naga-showcase sa maragtas kag kultural nga palanublion sang Syudad sang Koronadal.
Sa interview sang Bombo Radyo Koronadal, ginpahayag ni Templonuevo nga ang KoroAr amo ang iya thesis project nga nagakinahanglan sang madamo nga tion kag pagpangabudlay agud makompleto, bangud sa proseso sang paghimo kag pag-develop sang isa ka mobile application.
Suno kay Templonuevo, ginabug-usan sang 30 ka heritage items ang KoroAr, nga ginbahin sa tatlo ka kategorya: 10 ka indibidwal, 10 ka lugar, kag 10 ka artifacts nga may kaangtanan sa kasaysayan sang Koronadal.
Paagi sa mobile augmented reality technology, ginatuyo sang aplikasyon nga mapakilala sa mga gumamit ang nagkalain-lain nga importante nga tawo, lugar kag mga butang nga may kaangtanan sa maragtas sang syudad.
Dugang pa ni Templonuevo, ginhimo niya ang KoroAr agud mas madamo pa nga tawo ang makakilala kag makatuon bahin sa maragtas sang Koronadal paagi sa paggamit sang teknolohiya, kag agud mapalapnag ang kaalam bahin sa lokal nga kabilin sang syudad.
