Padayon ang koordinasyon sang City Environment and Natural Resources Office (CENRO) kag City Disaster Risk Reduction and Management Office (CDRRMO) sa pagpreparar sang mga pamaagi agud maminusan ang posible nga epekto sang Super El Niño.
Sa interview sang Bombo Radyo Koronadal, ginpahayag ni City Environment and Natural Resources Office Head Augustus Bretaña nga indi na bag-o sa Pilipinas ang El Niño, bangod nakaeksperyensya na ang pungsod sang amo nga kondisyon sang panahon nga naglawig sang sobra pito ka bulan.
Ginpaathag man ni Bretaña ang kinatuhayan sang dry spell kag drought.
Suno sa iya, ang dry spell amo ang malawig nga panahon nga kulang ang pag-ulan, apang mahimo pa nga mag-ulan sa sulod sang tatlo ka semana.
Samtang ang drought amo ang mas malawig nga kondisyon sang kakulang sang ulan kag tubig.
Dugang pa ni Bretaña, isa sa mga dapat hatagan sang atensyon ang nagabag-o nga mga kondisyon sang panahon nga may kaangtanan sa climate crisis.
Bangud sini, padayon ang pagpakig-angot sang CENRO kag CDRRMO sa pagplano sang mga mitigating measures agud mangin preparado ang syudad sa posible nga kakulang sang ulan kag tubig, kag sa iban pa nga epekto sang Super El Niño.
