Nagdangat na sa lima ang nadakpan sang Koronadal City Environment and Natural Resources Office (CENRO) nga nagasigarilyo kag naga-vape sa mga pickleball court sa syudad.
Sa interview sang Bombo Radyo Koronadal, ginpahayag ni Enforcement Division, Koronadal City ENRO Head Carmella Dawn Dumaup nga lima na ka indibidwal ang natiketan bangud sa paglapas sa pagsulundan nga nagadumili sang pagsigarilyo kag pag-vape sa mga pampubliko nga lugar.
Suno kay Dumaup, padayon ang pagmonitor sang ila opisina sa mga pickleball court agud matalupangdan ang mga nagalapas sa amo nga regulasyon kag mapatuman ang nagakaigo nga aksyon batok sa mga ini.
Ginpaathag man sang CENRO nga bisan pribado nga propiedad ang isa ka pickleball court, mahimo ini makabig nga pampubliko nga lugar kun bukas sa publiko kag nagabaton sang mga tawo nga nagabayad para makagamit sang pasilidad.
Apang, kun pamilya lamang ang nagagamit sang lugar, mahimo ini magpabilin nga pribado nga propiedad.
Bangud sini, padayon ang panawagan sang CENRO sa publiko nga tumanon ang mga regulasyon batok sa pagsigarilyo kag pag-vape agud mapadayon ang limpyo kag mahimsog nga palibot sa syudad sang Koronadal.
