Pila ka mga balay sa isa ka compound sa Barangay Aquino, Norala, South Cotabato, ang nasudlan sang tubig-baha matapos ang mabaskog nga ulan kahapon sang gab-i.
Sa interview sang Bombo Radyo Koronadal kay Joel Pineda, SK Chairman sang Barangay Aquino, iya ginpahayag nga nag-umpisa ang gulpi nga pagsaka sang tubig-baha sang mga alas 6 sang gab-i, nga nagresulta sa pagbaha sa pila ka panimalay sa ila nga compound.
Suno kay Pineda, isa sa mga rason kon ngaa mahinay ang paghupaw sang baha amo ang manubo nga lokasyon sang compound, bangud diri nagatipon kag nagadulong ang agas sang tubig halin sa palibot.
Dugang pa niya, wala man sang nagakaigo nga drainage system sa ila nga lugar, rason nga nagabalik ang agos sang tubig sa compound imbes nga magpadulong sa dam nga nahamtang sa banwa sang Sto. Niño.
Suno pa kay Pineda, kinaandan na nga makaeksperyensya sang pagbaha ang ila nga compound, apang indi kinaandan nga magtaas ini sa amo sini nga lebel kag makasulod na sa mga balay.
Sa karon, nagapabilin ang tubig-baha sa Purok Legada kag sa iban pa nga mga apektado nga lugar, samtang padayon nga ginatunaan sang kabalaka ang kahimtangan sang mga panimalay nga nasudlan sang baha.
