Ginpahayag sang Bureau of Fire Protection (BFP) Koronadal nga bastante ang ila fire truck kag masarangan ang pagresponde sa mga insidente sang sunog sa 27 ka barangay sa syudad.
Sa interview sang Bombo Radyo Koronadal kay FO1 Adelbert Santiago, Public Information Officer sang BFP Koronadal, ginpahayag niya nga masarangan sang mga fire truck sang ila talatapan ang madasig nga pagresponde sa mga sunog kag paghatag sang nagakaigo nga bulig sa mga residente nga apektado sang insidente.
Gindugang pa ni Santiago nga nagabalor sang P10 milyon ang kada unit sang fire truck kag may kapasidad ini nga magkarga sang sobra sa 4,000 ka litro nga tubig, nga magamit sa pag-apula sang kalayo.
Pinaagi sa kapasidad sang ila mga fire truck, ginpasiguro sang BFP Koronadal nga preparado ang ila mga kagamitan sa pag-atubang sang mga emerhensya kag sa pagresponde sa mga panawagan sang bulig halin sa nagkalain-lain nga barangay.
Sa pihak nga bahin, padayon naman ang kampanya sang BFP Koronadal angot sa luwas nga pag-usar sang kuryente, gani, padayon ang ila panawagan sa publiko nga mangin mahinalungon sa pag-usar sang kuryente kag chekyaron ang mga ini antes gamiton agud malikawan ang insidente sang sunog.
