Pormal nang ginpasaka sang Office of the Ombudsman sa Sandiganbayan ang kaso nga plunder batok kay anay House Speaker Martin Romualdez, anay Ako Bicol Representative Zaldy Co, kag iban pa, may kaangtanan sa ginaalegar nga anomalya sa flood control kickback scheme.
Ini ginkompirmar sang Sandiganbayan Judicial Records Division.
Bangud sini, nagpanawagan ang kampo ni Romualdez sang patas nga pagtratar kag nagapangabay nga hatagan sila sang bastante nga tion kag kahigayunan nga masabat ang mga bag-o nga alegasyon batok sa iya.
Suno kay Atty. Ade Fajardo, legal counsel kag spokesperson ni Romualdez, dapat ginpahibalo sila sang Ombudsman kun may opisyal nga pahayag si anay DPWH Secretary Manuel Bonoan batok sa anay speaker samtang yara pa sa preliminary investigation ang kaso.
Ginapangayo man sang iya legal team nga makita ang mga pahayag sang 28 ka bag-o nga testigo sang Ombudsman agud makapasa sila sang nagakaigo nga sabat kag kontra-affidavit.
Nagsugod ang pagkaulamid ni Romualdez sa kontrobersya sang Setyembre 2025 matapos siya ginhingadlan sang pila ka contractor kag anay security personnel sa mga hearing sa Senado.
Apang pila na ka beses nga ginpanginwala ni Romualdez ang mga alegasyon sang kickback kag ginpahayag nga wala siya sang kaangtanan sa pagpagwa sang pondo ukon sa pagpatuman sang mga proyekto sang DPWH.
Sa liwat naman nga ginpabaskog sang iya legal team nga wala sang matuod kag masaligan nga testigo nga direkta nga nagadugtong kay Romualdez sa ginaalegar nga anomalya sa mga proyekto sang flood control.
