Nanindugan si anay National Bureau of Investigation (NBI) Director Jaime Santiago nga gilayon nga ginpa-verify kag ginpa-authenticate ang kopya sang Zoom press conference ni Vice President Sara Duterte sang Nobyembre 23, 2024, kun sa diin ginpahayag ang iya ginapatihan nga mga pamahog batok kay President Ferdinand Marcos Jr., First Lady Liza Araneta-Marcos, kag House Speaker Martin Romualdez.
Suno kay Santiago, ginmandu-an niya dayon ang NBI Cybercrime Unit nga usisaon ang video kag makigkoordinar sa Meta agud mapamatud-an ang pagkatinuod sini.
Pagkatapos sang verification, nagtukod siya sang task force nga ginabug-usan sang mga abogado kag cybercrime experts para mag-imbestigar sa insidente.
Dugang pa niya, nagpadala ang NBI sang mga subpoena kag sulat kay VP Sara, apang wala ini nagsabat sa mga pagpatawag.
Ginpahayag man ni Santiago nga ginpahibalo nila ang bise presidente nga imbestigaran man ang iya mga alegasyon sang pamahog sa iya kabuhi, apang wala man siya nagsabat.
Ginpabutyag man sang anay NBI director nga indi dapat kabigon nga pamahog batok kay VP Sara ang ginatawag nga “Project Romanov.”
Suno sa iya, una ini nga nasambit ni Davao City Mayor Sebastian “Baste” Duterte kag ang konteksto sini mas nagapatuhoy sa ginapatihan nga pamahog batok kay Pangulong Marcos, indi sa bise presidente.
