Naglab-ot sa pinakamanubo nga balor ang piso kontra US dollar sang Hulyo 24, 2026 matapos ini nagsarado sa ₱61.84 batok sa kada US dollar, suno sa datos sang Bangko Sentral ng Pilipinas (BSP).
Amo ini ang pinakamaluya nga performance sang piso sa maragtas, nga naglampas pa sa nagligad nga record nga ₱61.75 kada US dollar.
Suno sa mga ekonomista, ang pagnubo sang balor sang piso ginatuga sang padayon nga tensyon sa Middle East, nga nagpasaka sang presyo sang petrolyo sa masobra US$100 kada bariles, nga nagdugang sang kabalaka sa inflation kag global nga kalakalan.
Ginpahayag man sang mga eksperto nga posible pa nga maglab-ot sa ₱62 kada US dollar ang exchange rate kon magpadayon ang kaingamo sa rehiyon kag ang mataas nga demand para sa US dollar.
Madumduman nga una na nga nagdeklarar si President Ferdinand Marcos Jr. sang state of energy emergency agud mahagan-hagan ang epekto sang padayon nga pagsaka sang presyo sang enerhiya sa pungsod.
Sa pihak sini, ginpasiguro sang Bangko Sentral ng Pilipinas nga preprado ini nga magpatigayon sang nagakaigo nga mga tikang agud mapunggan ang sobra nga pagtibusok sang balor sang piso kag mapabilin ang kalig-on sang ekonomiya.
