Muling iginiit ni Vice President Sara Duterte na walang matibay na batayan ang impeachment case laban sa kanya, kasabay ng pagtawag niya sa nagpapatuloy na paglilitis bilang pag-aaksaya umano ng pampublikong pondo.
Sa inilabas na pahayag, sinabi ng Bise Presidente na ang naging takbo ng ikaapat na araw ng impeachment trial ay lalo lamang umanong nagpatunay sa kanyang paninindigan na kulang ang ebidensiyang sumusuporta sa mga paratang laban sa kanya.
Partikular niyang itinanggi ang alegasyong nagbanta siya at umano’y nangontrata ng isang “assassin,” na aniya ay kathang-isip lamang at hindi maaaring ituring na katotohanan.
Binigyang-diin din ni Duterte na ang isang impeachment trial ay nararapat nakabatay sa kapani-paniwalang ebidensiya at hindi sa mga espekulasyon o haka-haka.
Dagdag pa niya, ang pagpapatuloy ng mga hakbang na wala umanong sapat na batayan ay maaaring makasama sa integridad ng mga institusyon, makapagpahina sa tiwala ng publiko, at makahadlang sa patas na paghahanap ng katotohanan.
