Nahaharap sa kasong Usurpation of Official Functions ang dating Overseas Workers Welfare Administration (OWWA) Administrator na si Arnell Ignacio matapos maglabas ng resolusyon ang Office of the Ombudsman kaugnay ng kontrobersyal na P1.4 bilyong property acquisition ng ahensiya.
Kinumpirma ni Department of Migrant Workers (DMW) Secretary Hans Leo Cacdac na natanggap ng kanilang tanggapan noong Hulyo 7, 2026 ang resolusyon ng Ombudsman na may petsang Hunyo 19, 2026.
Ayon sa imbestigasyon, nilagdaan umano ni Ignacio ang contract to sell, deed of absolute sale, at kaugnay na addendum ng transaksiyon, gayundin ang pag-apruba sa pagpapalabas ng pondo ng pamahalaan nang wala umanong pahintulot mula sa OWWA Board of Trustees.
Ipinunto ng Ombudsman na kumilos umano si Ignacio na tila may awtoridad mula sa Board kahit alam niyang wala siyang ganoong kapangyarihan. Dahil dito, itinuring ng Ombudsman na hindi lamang simpleng paglabag sa proseso ang nangyari kundi isang kasong maaaring pumasok sa Usurpation of Official Functions sa ilalim ng Article 177 ng Revised Penal Code.
Binigyang-diin din sa resolusyon na ang kawalan ng pag-apruba ng OWWA Board ay hindi lamang teknikal na pagkukulang kundi paglabag sa itinakdang institutional oversight at transparency na nakasaad sa OWWA Charter.
Ayon kay Cacdac, kapag napatunayang nagkasala, maaaring maharap si Ignacio sa parusang pagkakakulong ng anim na buwan hanggang apat na taon, depende sa magiging hatol ng korte. Inatasan na rin ng Ombudsman ang paghahain ng kaukulang impormasyon laban sa dating opisyal.
Samantala, ibinasura ng Ombudsman ang mga reklamong may kaugnayan sa paglabag sa Anti-Graft and Corrupt Practices Act, malversation of public funds, at plunder laban sa ilang dating opisyal ng OWWA at mga pribadong indibidwal na sangkot sa bentahan ng lupa.
Dahil dito, inanunsyo ni Cacdac na magsusumite ang DMW ng Motion for Reconsideration upang hilinging muling suriin ng Ombudsman ang naging desisyon sa mga ibinasurang reklamong may kaugnayan sa umano’y katiwalian.
