Nagpakitang-gilas ang Gilas Pilipinas Boys paagi sa mabaskog nga pagbalik sa fourth quarter agud mapierdi ang host country nga Thailand, 85-70, kag tapuson ang ila kampanya sa FIBA U18 Asia Cup SEABA Qualifiers nga wala sang kapirdehan.
Bisan nadula ang ila temprano nga double-digit nga abanse, nakabawi ang Gilas sa katapusan nga bahin sang hampang agud mapahipos ang home crowd kag maselyuhan ang ila kadalag-an.
Bisan napierde, nakasiguro man ang Thailand sang puwesto sa FIBA U18 Asia Cup sa Agosto kaupod sang Pilipinas bilang mga representante sang rehiyon.
Nagpanubo si Peerakan Wilairoj sang Thailand sang advantage sang Gilas sa isa ka puntos, 51-50, paagi sa asod-asod nga three-pointers sa third quarter.
Apang nagpanguna si Chog Moral sa isa ka 12-7 run nga nagbalik sang kontrol sa Pilipinas kag nagtapos ang quarter sa iskor nga 63-57.
Sa fourth quarter, nangin susi si Patrick Pasinos matapos makaiskor sang anum ka asod nga puntos agud mapadako ang abanse sa 74-63.
Ginselyuhan niya ang kadalag-an paagi sa isa ka step-back three-pointer nga nagpalawig sang lamang sa 81-65 nga may 57 segundos na lang nga nabilin sa hampang.
Nanguna sa opensa sang Gilas si Joaquin Tovera nga may 21 puntos. Nagdugang naman sanday Pasinos kag Ethan Aguas sang tig-13 puntos, samtang nagpagkit si Moral sang 10 puntos, pito ka rebounds, pito ka assists kag tatlo ka steals.
Sa bahin sang Thailand, nagpagkit si Lorenzo Ravazzini sang double-double nga 15 puntos kag 15 rebounds, samtang nagdugang sina Phurich Benjaariyakul kag Ronnie Allsopp sang tig-13 puntos.
