Posible nga matabo ang maragtason nga representasyon sang mga Pilipino sa umalabot nga NBA Finals, matapos malakip sa kontra nga hubon ang duha ka basketball players nga may dugo nga Pilipino nga sanday Jordan Clarkson sang New York Knicks kag Dylan Harper sang San Antonio Spurs.
Nahibaluan nga beteranong scorer kag madugay nga kilala sa Gilas Pilipinas program si Clarksoon nga may madalom nga koneksyon sa Pilipinas.
Kilala man siya sa pagsuksok sang jersey nga may nakasulat nga “PILIPINAS” sa mga international tournaments kag sa iya pagpartisipar bilang kabahin sang Philippine basketball scene sa mga nagligad nga tuig.
Samtang, si Harper naman ang 2025 No. 2 draft pick, ang ginakabig nga isa sa mga young guards sang liga kag bata sang anay NBA champion nga si Ron Harper, kag may dugo nga Pilipino bangud sa iya nanay nga isa ka Pinay nga si Maria Pizarro nga halin naman sa Bataan.
Madumduman nga ginapangunahan ni Victor Wembanyama ang Spurs nga nakatalana nga magapasakop sa Finals matapos malutos sa Game 7 ang Oklahoma City Thunder, Samtang makaatubang ang Knicks para sa pag abanse sa championship series.
