Kaangay nga wala matublag si Senator Risa Hontiveros sa pag-anunsyo ni Vice President Sara Duterte nga magapadalagan siya sa pagka-presidente sa 2028 national elections.
Suno kay Hontiveros, yara na ang oposisyon sa proseso sang pagpili sang ila standard bearer ukon kandidato para sa amo nga eleksyon.
Pahayag niya, nga indi magbag-o ang ila timetable sa paghimo sang desisyon kon sin-o ang ila mangin manok kag igaanunsyo nila ini sa yearend ukon sa 1st quarter sang 2027.
Paathag ni Hontiveros, nga ang parehas nga kinaiya nga ginapangita nila sa ila hanay amo ang kagustuhan sa anti-corruption kag good governance, ang pagtubo kag pagpaambit sang bunga sang mas masanyog nga ekonomiya, ang matuod nga paghugpong sa nagabinahin-bahin nga sosyodad, kag ang pagdepensa sa soberanya sang pungsod kag iban pa.
Nahibaluan nga pila ka mga senador, lakip na si Hontiveros, ang ginalantaw nga posible mangin kandidato sang oposisyon sa pagka-presidente.
Nagpabutyag naman ang Senadora sang iya kahandaan nga magpadalagan kon siya ang mapilian sang ila nga hanay.
Samtang, mabaskog man gihapon ang panawagan sang publiko nga liwat magpadalagan sa pagka-presidente sa 2028 elections si anay Vice President kag karon Naga City Mayor Leni Robredo.
