Narekober ang lima ka mga patay nga lawas nga ginapatihan nga halin sa missing nga barko nga MBCA Amejara.
Suno kay Coast Guard Southeastern Mindanao Commander Commodore Philipps Soria, apat (4) ka bangkay ang una nga narekober, kag isa pa ka floating cadaver ang nakit-an sang mga piloto sang Coast Guard.
Ginatutukan sa kasamtangan sang Philippine Coast Guard (PCG) ang retrieval sang mga patay nga lawas, kag nakig-angot man sila sa Philippine Navy para kuhaon ang mga ini.
Ginpahayag ni Soria nga padayon ang search and rescue operations agud mangita sang posible pa nga nakaluwas nga mga biktima sang MBCA Amejara.
Madumduman nga ang MBCA Amejara nadula sang Lunes, Enero 19, samtang nagalawig sa Davao Gulf.
Suno sa datos sang PCG sang Huwebes, tatlo (3) ka crew members kag 12 ka pasahero pa ang ginakabig nga missing, samtang isa (1) ka crew member lang ang na-report nga naluwas sang mga otoridad.
