Ginaplanuhan na sa subong sang Department of Environment and Natural Resources Region 12 DENR-XII ang pag deputize ang mga Local Government Units sa Rehiyon nga mag-imposar sang mga naga kaangay nga tikang agud nga tapnaon ang illegal nga mina sa Rehiyon.
Ini ang nangin pahayag ni DENR-XII Regional Executive Director Atty. Felix Alicer sa interview sang Bombo Radyo Koronadal.
Suno sa iya, mas maayo man ini nga tikang agud nga mag serbi nga extension sang ila nga departamento ang mga LGUs sa pagpatuman sang kasuguan.
Madumduman nga naghangyo sang deputization ang LGU-Tampakan pinaagi kay Kap. Niel Ryan Escobillo sang Pula Bato agud nga mangin tikang nga mangin epektibo sa batok sa mga banlasero bangud madulaan ang mga ini sang gamit sa ila nga illegal nga operasyon.
Dugang pa sini, nagakadapat man nga mabutangan sang field office sang Task Force Banlas sang MGB ang sang tatlo ka mga nakapalibot nga barangay sa Campo Kilot agud nga epektibo nga mabantayan sang mga ini ang illegal nga operasyon sa nasambit nga lugar.
Nagpaandam naman ini sa mga nagapatigayon sang illegal nga banlas sa ila nga nasakupan nga posible nga magapangatubang ang mga ini sang penalidad kun madakpan nga nagapatigayon sang illegal nga banlas labi na nga ini ang nakita nga rason sang mga otoridad kun ngaa nagakaguba ang alagyan sa nasambit nga lugar.
