Nalipay ang Philippine Olympic Committee (POC) sa nangin resulta sang performance sang Pilipinas sa nagtakop lang nga 33rd Southeast Asian Games.
Suno kay POC president Abraham “Bambol” Tolentino, bisan pa wala nalampasan ang nagligad nga record sang medalya nga nakuha kag nagpanubo ang ranggo halin sa pang-lima pakadto sa pang-anom subong nga tuig, kuntento man gihapon sila. Sa pagtakop sang torneo sang Sabado sa gab-i, nakalikom ang Pilipinas sang 50 ka bulawan nga medalya, 73 ka silver, kag 154 ka bronse nga medalya.
Kun ikumpara sa SEA Games duha ka tuig ang nagligad nga ginhiwat sa Cambodia, may 58 ka bulawan, 85 ka silver, kag 117 ka bronse nga medalya ang nakuha sang pungsod.
Madumduman nga napulo na lang ka mga pungsod ang nagpartisipar matapos mag-atras ang Cambodia bangud sa indi pag intindihanay nila sang Thailand sa border.
