KORONADAL CITY – Nagpadala sang bulig ang provincial government sang South Cotabato sa mga naapektuhan sang 6.9 magnitude nga linog nga nag-igo sa Cebu sang tinalikdan nga Martes, Setyembre 30,2025.
Ginpangunahan ni South Cotabato Governor kag PFP National President Reynaldo Sucayan Tamayo Jr. ang humanitarian mission, kaupod ang una nga batch sang Provincial Medical Team kag ang Provincial Disaster Risk Reduction and Management Office ukon PDRRMO sa pagpamuno ni Rolly Doane Aquino.
Sa interview sang Bombo Radyo Koronadal kay PDRRMO Aquino, ginpahayag sini nga kadungan sang ila nga pagpadulong sa Cebu ang pagdala man sang mga relief assistance nga may kaundan sang food supplies, tubog, hygiene kits kag kitchen essentials, bilang bulig sang mga pumuluyo sang South Cotabato sa mga naapektuhan sang linog.
Kaupod man sa operasyon ang Provincial Engineering Office nga ginapamunuan ni Engr. Lloyd Esparagosa agud masiguro ang maayo nga distribusyon sang bulig.
Suno naman kay Governor Tamayo, magluwas sa relief goods dala nila ang serbisyo nga pang-medikal kag disaster response.
kadungan sini, gin-awhag sang gobernador ang tanan nga ipangamuyo ang kaluwasan kag madasig nga pagbangon sang mga residente nga nahalitan sang nasambit nga kalamidad.
