Ginpakumpirmar sang mga otoridad nga naka piyansa ang 47-anyos nga lalaki nga driver sang SUV sa trahedya nga aksidente sa Ninoy Aquino International Airport (NAIA) nga nagresulta sa pagkapatay sang duha ka indibidwal.
Suno sa report, ginpahamtang sang Pasay City Regional Trial Court ang piyansa nga nagalab-ut sa P100,000 para sa kaso nga reckless imprudence resulting in double homicide, multiple serious physical injuries, kag damage to property.
Ginpahayag ni Manila International Airport Authority (MIAA) General Manager Eric Ines nga obligado sila nga magtuman sa mando sang korte matapos nila mabaton ang bail order halin sa Pasay RTC.
Ginpasiguro man sang PNP Aviation Security Group nga nabaton na nila ang opisyal nga mando halin sa korte.
Ang grupo amo man ang nanguna sa imbestigasyon sang insidente.
Base sa imbestigasyon, natabo ang aksidente sa departure entrance sang NAIA Terminal 1, kun sa diin napatay ang apat ka tuig nga babayi kag 29-anyos nga lalaki matapos mabungguan sang SUV.
Ginpanginwala sang driver nga may tinuyo sa natabo kag nagpanginmatinlo nga isa lamang ini ka aksidente.
Ginkumpirmar man sang otoridad nga negatibo sa ilegal nga droga kag alkohol ang driver sang ginpaidalum ini sa testing.
Sa gihapon, ginapanawagan sang pamilya sang mga biktima ang hustisya, samtang ginapadayon ang mas lapad nga imbestigasyon sang mga otoridad.
