Ginkasuhan sang National Bureau of Investigation (NBI) si Atty. Raul Lambino tungod sa paglapnag sang sala nga impormasyon.
Upod nga ginkasuha sang NBI sa Department of Justice (DOJ) si anay National Youth Commission (NYC) commissioner Ronald Cardema.
Suno kay NBI Technical Intelligence Service Agent Allen Rey Delfin, ang duha nagaatubang sang kaso nga may kaangtanan sa Article 154 sang Revised Penal Code ukon unlawful use of means of publication ukon unlawful utterances.
Posible nga makulong sila sang isa ka bulan kag magabayad sang multa nga nagakantidad sang P40,000 tubtob P200,000.
Nagbukas ang kaso sang tunga-tunga sang pag-aresto kay dating Pangulo Rodrigo Duterte sang International Criminal Court (ICC) sang Marso 11, kun sa diin sa live video ni Lambino, iya ginlapnag nga may Temporary Restraining Order (TRO) nga ginpagwa ang Korte Suprema para sa pag-aresto kay Duterte, apang wala sang TRO nga ginpagwa.
Amo man ang ginhimo ni Cardema sang ini nakapanayam sa Villamor Air Base agud protektahan si Duterte.
