Ginpabutyag sang anay aktres nga si Andi Eigenmann nga wala gid nag-cheat sa iya ang iya fiancé kag Siargao-based surfer nga si Philmar Alipayo.
Ginhimo ni Andi ini nga pahayag matapos ang pila ka cryptic nga IG story nga nagpangdala sang espekulasyon parte sa ila pagpangbulagay.
Sa iya gin-share nga IG story, Sabado, Pebrero 8, naghatag si Andi sang mas klaro nga konteksto sa iya mga una nga posts kag nagsiling nga ini nga mga posts iya ginatuyo para sa isa ka babayi nga ginbuso siya, apang wala niya ginpangalanan.
Suno sa iya, sa tagsa nga magkaupod ang iya fiancé kag amo nga babayi, ara man siya upod nila.
Ginpatag man ni Andi kung ngaa nagpost siya parte sa amo nga isyu—kay gintraydor kuno siya sang amo nga tawo nga nagapanghagad sa iya fiancé nga magbulagay sila tagsa nga may indi paghangpanay bisan pa nga ginapamatian man sang fiancé niya ang iya side.
Gindugang man ni Andi sa iya IG story nga ang amo nga babayi nagpatattoo sang “224,” pareho sa tattoo mark sang iya fiancé, nga wala man lang ginhunahuna ang iya mabatyagan.
Ginsulayan man sang anay aktres nga i-reach out ang amo nga babayi para makapaathag, pero ginsnab lang siya.
Ginsiling man ni Andi nga gin-share niya ang amo nga mga posts agud maghatag sang awareness sa iban nga indi normal ang iya sitwasyon.
Naghatag man sang pahayag ang fiancé ni Andi nga si Philmar sa iya IG story kag ginkumpirma ang ginhambal sang iya fiancée.
Ginsabat man ni Philmar ang mga netizens nga nagapanugid sa iya nga cheater kag pangit, apang nagpasalamat siya sa mga tawo nga nagakilala sa iya sang matuo.
Nadumduman man nga na-engage sanday Andi kag Philmar sang Disyembre 2020 kag may duha na sila ka bata, sanday Lilo kag Koa, samtang may isa pa ka bata si Andi sa iya anay karelasyon nga si Ellie.
