Magahatag si President Ferdinand Marcos Jr. sang yearend gratuity pay nga tubtob P7,000 sa mga Contract of Service (COS) kag Job Order (JO) nga mga trabahador sa gobyerno.
Ini matapos nag-isyu si Marcos sang Administrative Order 28, nga nagahatag sang isa ka beses nga gratuity pay nga indi maglapaw sa P7,000 para sa fiscal year 2024 sa mga Contract of Service kag Job Order nga empleyado nga nakahatag sang total ukon kabug-usan nga apat ka bulan nga serbisyo tubtob Disyembre 15.
Samtang, ang mga trabahador nga nagserbisyo sang mas manubo sa apat ka bulan mahimo man nga makabaton sang gratuity pay nga base sa pro-rata. Nasaad sa Administrative Order nga ang pagbayad sang gratuity pay sa mga kwalipikado nga Contract of Service kag Job Order himuon pagkatapos sang Disyembre 15, 2024.
Nahibaluan nga sa masobra sa duha ka million nga mga trabahador sa gobyerno, masobra sa 1.8 million ang career employees kag 193,000 naman ang coterminous, casual, ukon contractual nga mga trabahador.
Samtang, masobra sa 203,000 nga mga posisyon sa gobyerno ang wala pa ginasudlan, suno sa Civil Service Commission sang Agosto subong nga tuig.
