Nagasuspetsa si Senator Risa Hontiveros nga may mga opisyal sang gobyerno nga nagbulig sa “big boss” sang Philippine Offshore Gaming Operator (POGO) nga si Lin Xuhan ukon si Lyu Dong agud nga mapasangkad sini ang iya network diri sa Pilipinas.
Suno kay Hontiveros, apisar pa nga isa ka daku nga kadalag-an ang pagka-aresto kay Lyu, dapat nga magpabilin gihapon nga vigilante ang mga otoridad.
Importante nga matumod ang Filipino associates sini suno sa senadora bangud sa kadamuon sang POGO hub nga gina-operate sini sa pungsod, imposible nga mahimo niya ini nga wala sang bulig halin sa gobyerno.
“Sa dami ng mga in-operate na POGO hub ni Lyu Dong, hindi niya ito pwede nagawa ng walang kumanlong na kawani ng gobyerno. I hope that we can also identify the Filipino associates of Lyu Dong,” kabahin sang statement sang senadora.
Matandaan nga gin-report sang Presidential Anti-Organized Crime Commission (PAOCC) nga nadakpan si Lyu kag ang iban pa nga Chinese nationals sa isa ka residential subdivision sang nagligad nga gab-i.
Suno kay PAOCC chief Usec. Gilbert Cruz, napaidalom na sila sa inquest proceedings, magapabilin anay si Lyu sa ila kustodiya, samtang ang iban naman ang iga-deport.
Kinahanglan hawidan suno sa iya si Lyu bangud naangot na ini sa POGO hub nga Lucky South 99 sa Porac, Pampanga nga ginakaulamiran man ni Cassandra Li Ong kag ang Pogo hub nga Hongsheng Gaming Technology (Zun Yuan Technology) sa Bamban, Tarlac nga naangot naman kay dismissed Mayor Alice Guo.
Suno sa PAOCC, si Lyu ang nag-abot sa Pilipinas sang 26-anyos pa lamang ang iya edad kag subong naga-edad na ini sang 39.
Si Lyu nga nabun-ag sa Fujian, China ang kilala man sa alias nga Bogo, Boga, Xiao Long, Apao, Pahao, kag Hao Hao nga buot silingon Boss of the Boss.
May presensya man ini sa mga syudad sa Metro Manila kaangay sang Pasay, Parañaque, Manila, kag Makati, kag naga-operate man sa Ilocos Sur sa northern Philippines kag Cebu sa Central Visayas.
