Ginkumpirmar sang Philippine Navy nga yara sa gihapon ang presensiya sang mga barko sang China sa West Philippine Sea (WPS).
Suno kay Rear Admiral Roy Vincent Trinidad, Spokesperson sang Philippine Navy sa WPS, nagalab-ot sa karun sa 178 ka mga Chinese vessels ang yara sa sulod sang teritoryo sang Pilipinas.
Sa nasambit nga numero, 17 diri ang Chinese Peoples Liberation Army Navy (PLAN) warship vessels.
Lima sa PLAN ships ang yara sa bisinidad sang Escoda (Sabina) Shoal kag tig duha sa Ayungin, Pagasa Island, Iroquis Reef, kag tig-isa naman sa Bajo de Masinloc (Scarborough Shoal), Parola Island, Likas Island, Lawak Island, Panata Island kag Rizal Reef.
Namonitor man sa WPS ang 131 ka Chinese Maritime Militia Vessels (CMMVs), 28 China Coast Guard Vessels (CCGVs) kag duha ka Chinese Research Survey Vessels (CRSVS).
Sa pihak sang dako nga puwersa sang China sa WPS, ginpasalig ni Trinidad nga padayon ang Armed Forces of the Philippines (AFP) sa pagpasiguro nga madepensahan ang pungsod batuk sa mga nagapamigos kag mananakop.
