Nangin emosyonal ang 31 anyos nga si Miley Cyrus samtang nagahatag ini sang iya nga speech sang iya ginbaton ang award bilang pinakabata nga Disney Legend sa Disney23 event nga ginhiwat sa Anaheim, California.
Sa kaundan sang iya speech, gindetalye sang singer ang iya nga audition experience kag kon ano kadako nga bugal para sa iya ang pagkabuhi sang karakter sang bida sa Disney Television series nga “Hanna Montana”.
Paagi naman sa Instagram post sang singer, iya ginpalab-ot ang iya pagpasalamat sa Disney kag iya ginadedikar ang nabaton nga award sa karakter nga si Hannah Montana kag sa mga fans sini.
Suno sa Disney, ang mahingadlan bilang Disney Legend ang pinakamataas nga dungog nga ginahalad sang The Walt Disney Company.
Kilala si Miley sa iya mga kanta kalakip na ang “The Climb” ,“Wrecking Ball” , kag “Party in the USA”.
