Malipayon nga gipahayag ni Barangay Saravia Chairperson Ruel Artil nga nagahatag sang positibo nga paglaum ang pag-construct na sang sang Department of Public Works and Highways ukon DPWH 12 sang center island sa ginakabig nga “killer highway” sa siyudad sang Koronadal.
Gin-umpisahan ini sang adlaw sang Huwebes, Agosto 8,2024 sa diin nagpaguwa na sang advisory ang DPWH 12 kadungan sang ila pagpamutang sang signage kag iban pa nga kagamitan sa tunga sang national highway.
Magasugod ang nasambit nga center island sa Purok Ilang-ilang, Brgy. Saravia padulong sa Brgy. Carpenter Hill nga may kalabaon nga 6.7 kilometers.
Suno sa Kapitan, isa ini ka maayo nga proyekto sa dalanon agud nga magnubo kag malikawan nga masami nga disgrasya sa dalanon labi pa sa tion sang kagab-ihon sa diin madulom ang dalanon kag masami man nga pag overtake sang mga salakyan nga isa man sa mga kabangdanan sang aksidente sa diin makapagkit sang malala nga pilas ukon kamatayon.
Ginapanan-aw man sini nga masami nga human error ang dako nga maka kontribwer sang bangga-an sa dalanan sa diin masami nga nga luntad sa kalabaon sang national highway nga sakop sang Barangay Saravia kag Barangay Carpenter Hill.
