KORONADAL CITY – Nagakaangay nga may yara sang husto nga preparasyon ang kada pamilya sa kada puluy-an sa tion sang kalamidad labi pa nga masami nga nagatupa ang mabaskog nga pag-ulan nga mahimo nga mangin tunaan sang landslide kag pagbaha.
Ini ang nangin pahayag ni OCD-12 Information Officer Joriemae Balmediano sa interview sang Bombo Radyo Koronadal.
Madumduman nga Duha tubtob tatlo ka bagyo ang ginalauman nga magasulod sa Philippine Area of Responsibility (PAR) subong nga bulan sang Hulyo.
Suno kay weather specialist Glaiza Escullar, kapareho man nga numero sang bagyo ang posibli magsulod sa PAR sa bulan sang Agosto, Setyembre kag Oktubre.
Isa tubtob duha naman ka tropical cyclones sa Nobyembre kag Disyembre ang ginalantaw sang PAGASA.
Samtang posibli sa tunga-tunga sang Setyembre kag Nobyembre mabatyagan ang mahina nga La Niña sa pungsod, sa baylo nga Agosto tubtob Oktubre, bangud sa pila ka kondisyon sa kalalawran.
Matandaan nga Mayo 29 sang gindeklarar sang PAGASA ang pagsugod sang tingulan kag Hunyo 7 naman nagtakop ang El Niño phenomenon.
