Ginmandu-an sang Malacañang ang national government agencies kag instrumentalities nga i-encourage ang local government units (LGUs) nga ilakip ang pagkanta sang “Bagong Pilipinas” hymn sa weekly flag ceremonies.
Tinutuyo sang tikang nga ipatudok ang prinsipyo sang Bagong Pilipinas brand sa patag sang pang-gobyerno kag lederato para sa mga Filipino. Ini kasunod man sang pagpirma ni Executive Secretary Lucas Bersamin sang Memorandum Circular 52 sang Hunyo 4, 2024.
Ginmandu-an man sang Malacañang ang mga heads sang tanan nga national government agencies and instrumentalities, lakip ang government-owned and controlled corporations, kag educational institutions, nga siguraduhon nga ang Bagong Pilipinas hymn and pledge ang ma-disseminate sa tagsa ka institusyon kag opisina.
Ang Presidential Communications Office (PCO) ang ginmandu-an man nga i-implementar ang mga measures agud makakoordinar kag mahimo nga mapatuman ang hymn kag pledge sa tanan nga government agencies. Matandaan nga sang Hulyo 2023, si President Ferdinand Marcos Jr. ang nagmandu man sa national government agencies nga adoptaron sang administrasyon ang governance slogan nga “Bagong Pilipinas” sa tanan nga mga programa kag proyekto.
Nakasaad naman sa Memorandum Circular 24, nga ang Bagong Pilipinas slogan ang nagapanawagan sang madalum nga pagbag-o sa tanan nga sektor sang sosyudad kag gobyerno agud mapasanyog ang tinutuyo sang pungsod nga malab-ot ang komoprehensibo nga policy reforms kag economic recovery.
Nahibaluan nga ang Bagong Pilipinas ang nagadala sang resemblance sang “Bagong Lipunan” nga vision sang napatalsik nga anay presidente nga si Ferdinand Marcos Sr.
