Ginganyat ni Commission on Elections (Comelec) chairman George Erwin Garcia ang mga botante nga mangin vigilante batuk sa kwestyonable nga personalidad nga magapapili sa 2025 midterm elections.
Ginganyat man sang opisyal, ang mga botante nga gilayon magpasaka sang disqualification case batuk sa indi nagakadapat nga kandidato sa tion sang filing agud matadlong ini sang komisyon ukon cancellation sang kandidatura.
Mahibaluan nga pananglitan nga matapos na ang period sang pagplastar sang kandidatura, wala sang hurisdiksiyon ang Comelec.
Samtang, indi naman pabor ang Comelec chairman sa ideya nga hatagan sang discretionary powers ang poll body agud aprubahan ukon balibaran ang COC applicant.
Ang nasambit nga pahayag sang comelec official ang kadungan sang kontrebersiya nga nagputos kay Bamban, Tarlac Mayor Alice Guo nga sa karun padayon nga gina-imbestigahan bangud sa kwestyonable nga nasyonalidad sini kag posible nga Chinese asset matapos nga maulamid ang iya pangalan sa isa ka POGO firm.
Matandaan una na nga gin-eksplekar sang Comelec nga wala sang nagpanghangkat ukon nagkwestyon sa kandidatura ni Guo sang nagpapili ini sa 2022 election sa diin nangin tulay agud mangin alkalde sang Bamban.
Nagsumite naman sang poll body sa Office of the Solicitor General (OSG) ang Statement of Contributions and Expenditures (SOCE) ni Bamban Mayor Alice Guo kaupod ang Certificate of Candidacy, kag voter’s registration records.
