KORONADAL CITY – Nagalab-ot sa P40,000 ang inisyal nga damyos sa pagkasunog sang panimalay sang pamilya Intal sa Purok Maligaya, Barangay Magsaysay, Koronadal City pasado alas-12 kaina sang udto.
Ini ang ginkumpirmar ni FO3 Ricky Villacora, imbestigador sang BFP Koronadal sa interbyu sang Bombo Radyo.
Suno kay Villacora, nagsugod ang kalayo sa isa ka kwarto sang panimalay nanday Mr. & Mrs. Romeo kag Virginia Intal.
Sandig sa imbestigasyon, dako ang posibilidad nga naghampang sa posporo ukon lighter ang mga bata nga nagsulod sa kwarto ni George Intal rason nga madasig nga gindakop sang kalayo.
Maayo na lamang kay nagbinuligay man ang mga kaingod sang nasunugan rason nga madasig man nga naapula ang kalayo.
Yara naman sa 30 porsiyento sang panimalay sang Pamilya Intal ang nasunog.
Kaangot sini, emosyonal naman nga nagapangayo sang bulig si Ginang Virginia sa mga may maayo nga kabubut-on bangud naubos gid snag sunog ang mga bayo kag gamit sa eskwelahan sang iya mga bata kag apo.
