KORONADAL CITY – May persons of interest na nga ginatutukan ang kapulisan sa kamatayon sang Human rights lawyer kag Vice Chairman sang Union Peoples Lawyer of Mindanao (UPLM) nga si Atty. Juan Macababad.
Ini ang ginpahayag ni Police Col. Jemuel Siason, provincial director sang South Cotabato sa interbyu sang Bombo Radyo Koronadal.
Suno kay Siason, planado ang pagpatay kay Atty. Macababad sang 3 ka mga wala pa makilala nga mga suspek nga ginapatihan hired ukon katapu sang armado nga grupo.
Naguwa man sa imbestigasyon sang kapulisan nga may mga nabaton nga death threat ang abogado nagikan sa isa sa mga kliyente sini antes pa man nagluntad ang krimen.
Sa karon, job related ang ginalantaw nga motibo sa pagpatay sa biktima.
Apang, ginachekyar man ang iban pa nga anggulo matapos nga may nakuha sa crime scene nga envelope nga may isa ka sachet sang ginapatihan nga shabu nga subject for examination pa sang crime laboratory.
Magluwas sini nakuha man sa crime scene ang 5 ka bahin sang cartridge sang caliber 45 kag 1 ka deform nga slug.
Sa karon, ginalantaw pa kun may mga CCTV footages malapit sa ginluntaran sang insidente.
Ginmanduan man sang opisyal ang hepe sang Surallah Municipal Police Station nga solbaron ang kaso sa sulod lamang sang isa ka semana.
Samtang, ginakabig naman nga isolated case ang natabo kay Atty. Macababad.
