KORONADAL CITY – Pagahilwayon na halin sa kustudiya sang Koronadal City PNP ang 2 ka mga persona nga gilagas kag nadakpan sang mga kapulisan kagab-e kag una na nga gina alegar nga mga motornappers sang mga kapulisan bangud sa kawad-an sang ebidensya batok sa mga suspek.
Ini ang nangin pahayag ni PMaj. Rommel Hitalia , Deputy Chief of Police sang Koronadal City PNP.
Suno sa opisyal, hilwayon na ang 2 ka persona bangud wala man sang makapamatood nga ang 2 k persona ang imbolbado sa asud-asud nga kinawatay sang motor sa syudad.
Sandig sa ila nga pakighinun-anun sa mga nagkaladakpan nga suspek , nagpadasig ang mga ini sang pagapadalagan sang motor bangud wala sang lisensya kag mga dokumento nga ipakita ang mga ini sa mga otoridad nga naga lagas sa ila.
Dugang pa sini, bangud sa makaduluda nga hinimo sang mga suspek ginlagas ini sang mga motorcops kag nadakpan sa atubangan sang Koronadal City Integrated Public Terminal bangud nakabangga sa kotse ang mga suspek nga sanday Alvin Guadalupe kag John Christian Hamasa, nga lunsay residente sang Koronadal.
Bangud wala sang husto nga mga ebidensya batok sa mga suspek abswelto na sa alegasyon nga mga motornapper ang mga ini apang maga pangatubang ang duha sa kaso sang pagbayolar sa Article 151 sang Revised Penal Code ukon disobidience to person in Authority kag amu man sa kaso nga Reckless imprudence resulting to damage to property bangud sa gintuga nga pagkaguba sa bahin sang isa ka kotse.
