KORONADAL CITY – Determinado sa subong ang isa ka Misis nga madakpan gilayon ang Mister nga makapila ka beses nga naglugos tubtob nagbusong ang 11-anyos nga kaugalingon nga bata nga babaye sang mga ini.
Sa eksklusibo nga interbyu sang Bombo Radyo Koronadal kay Ginang Elena, luyag nila nga mapahamtangan gilayon sang penalidad ang suspek matapos matukiban ang natabo bangud sa resulta sang Ultra Sound sang biktima.
Sa subong yara na sa pag-inakop sang DSWD ang biktima bangud yara pa sa Kuwait ang iloy sini.
Suno naman sa panaysayon sang biktima nagsugod ang pagpang-abuso sang iya amay sang yara na sa iban nga pungsod ang iya iloy kag ginahimo mismo sa ila puluy-an sa banwa sang Esperanza, Sultan Kudarat.
Ginpahayag pa sang biktima nga sang una nagakatingala siya nga ginapatulog ini sa separar nga kwarto sang iya amay nga wala sang kaupod samtang ululupod naman ang iban sini nga mga utod.
Pag-abot suno pa sang alas-12 sang tungang gab-i ginakadtuan ini sang iya amay sa kwarto kag ginalugos samtang ginatayaan sang armas luthang.
Ginahadlok man ini sang iya amay nga patyon ang iya mga utod kun indi ini magpasugot kag may pagasugiran.
