KORONADAL CITY – Padayon nga ginakumpirmar sang Philippine Army ang nagtuhaw nga mga impormasyon nga may yara suno pa sang pila ka mga kabataan nga miyembro sang Bangsamoro Islamic Freedom Fighters (BIFF) kag Dawlah Islamiya terror group nga nagpanguna sa pag-atake sa Datu Piang, Maguindanao.
Suno sa pila ka mga residente, nabatian nila ang pila ka mga kabataan nga nagasinggit sang “Allahu Akbar” sang makapila ka bes dala ang ila mga armas.
Pagasunugon suno pa nila ang Sta. Teresita parish church apang ginpunggan sila sang ila tigulang nga mga kaupdanan.
Tuman suno pa ka-agresibo ang mga ini kag luyag nga sudlon ang simbahan kag halitan ang mga residente apang wala sila ginpahanugotan sa pahayag nga target lamang suno pa nila ang hepe sang Datu Piang PNP nga si PCapt. Israel Bayona.
Suno kay Lt. Col. Anhouvic Atilano, spokesperson sang 6th Infantry Division Philippine Army, ginkilala sini ang mga suspek nga mga miyembro ni Karialan Saga Animbang sang Karialan faction sang BIFF kag Kumander Sukarno Guilil alyas Motorola, nga isa sa mga nagapanguna sa mga pag-atake sa mga military kag police detachments.
Base sa ulihi nga mga impormasyon, yara sa tatlo ka mga katapo sang BIFF ang napatay makaligad ang ila pag-atake antes nag-isol bangud sa pag-abot sang reinforcements sang mga suldado.
