KORONADAL CITY – Patay ang anom ka mga suspek nga ginapatihan nga mga miyembro sang Dawlah Islamiyah- Ansar Khilafa Philippines-Maguid Remnants terror group makaligad ang ginpatigayon nga law enforcement operation sa bahin sang Prk. 6, Brgy. Koronadal Proper, Polomolok, South Cotabato pasado alas 5 kaina sang aga.
Sa interbyu sang Bombo Radyo Koronadal kay South Cotabato Provincial Director Col. Jemuel Siason, ginpahayag sini nga igaserbe kuntani ang warrant of arrest batok sa grupo ni Arafat Bulacon alyas Maula nga Sub-leader sang nasambit nga grupo kag lima pa ka suspetsado apang hinali nga nagbato ang mga suspek.
Magluwas sa mga napatay, duha ka katapo sang PNP-Special Action Force ang pilason kag kasamtangan nga ginabulong na sa balay-bulolngan nga ginkilala kanday PCpl. Bryan Cabreros kag Pat. Ronald Nipalam.
Ginbuyagyag ni Siason nga si Bulacon ang magatal-os suno pa kay Geoffrey Nilong nga napatay sa checkpoint operation sa banwa sang Surallah, South Cotabato.
Nakuha sa crime scene ang 5.56 M4 rifle, 2 12 gauge shotgun, 2 caliber 38 revolver, isa ka 5.56 pistol, isa ka IED kag isa ka ISIS flag.
Si Bulacon ang responsable suno pa sa General Santos City bombing sadtong 2018.
Nahibaloan nga lunsay mga high value target ang mga ini kun sa diin mga suspek kung saan sangkot ang mga ini sa robbery, extortion, pagpamomba kag pagluthang patay sa pila ka mga katapo sang kapulisan sang nakaligad nga mga bulan.
Sa subong ginkilala ang lima nga iban pa nga napatay sa nasambit nga engkwentro nga sanday: Rusdy Saladao alyas Jayton, Norman Insag Marot, Arsad Insag Marot, Abdulbayan Insag Marot kag Mananding Insag Marot.
Ang nasambit nga operasyon ang ginpatigayon sang joint forces sang 5th Special Forces Batallion, 4th Special Batallion, 6th Infantry Division kag pulisya.
