KORONADAL CITY – Yara na subong sa kustodiya sang mga otoridad ang ginakabig nga prime suspect sa serye sang mga pagpamomba sa banwa sang Isulan, Sultan Kudarat sadtong 2018.
Ini ang ginkumpirmar sa Bombo Radyo Koronadal ni Isulan PNP chief of police Lt. Col. Modesto Carrera.
Ginkilala ni Lt. Col. Carrera ang suspek nga si Norhasim Esmail alyas Momong, 25 anyos residente sang Maguindanao nga ginakabig nga trained Bomber kag myembro sang BIFF-local ISIS group.
Suno kay Carrera, nadakpan ang suspek san gintingob nga pwersa sang Special Action Force, SAF Batallion , Sultan Kudarat Intel Unit, Ampatuan Intel Unit, Sultan Kudarat High Patrol kag Isulan PNP.
Nadakpan si Esmael sa bahin sang National High way , Barangay Ampatuan Maguindanao sakay sang Pampasehero nga Van Pasado alas 8 sang aga.
Nagapangatubang ang suspek sa patong-patong nga kaso nga Murder, Frustrated Murder kag Multiple Frustrated Murder.
Madumduman nga duha ang ginbawian sang kabuhi samtang yara sa masobra 30 ka sibilyan ang napilasan sa nagluntad nga Isulan Bombing incident.
