KORONADAL CITY – Nagapadayon ang imbestigasyon sang kapulisan sa nagluntad nga pagpangluthang sa isa ka tribal wedding proposal rites sa Sitio Malnog, Barangay Magsaysay, Polomolok, South Cotabato.
Ginkilala ang napatay nga si Elezar Mahilum, 42 anyos nga residente sang nasambit nga lugar samtang pilason naman ang isa ka menor de edad nga gilayon gindala sa isa ka hospital.
Sandig sa report, samtang nagapatigayon sang pagtililipon para sa tribal wedding proposal rites ang mga residente sa lugar hinali na lamang nga nagpanalakay ang isa ka wala pa makilala nga suspek kag nagpangluthang.
Naigo si Mahilum sa nagkalain-lain nga bahin sang iya lawas nga nagresulta sa pagkamatay sini samtang gindala naman sa hospital ang menor de edad.
Ginahibalo pa sang kapulisan kun ano ang motibo sang suspek sa pagpangluthang.
Samtang, nagapadayon pa ang pagpangita sa suspek.
