KORONADAL CITY – Nagpositibo sa coronavirus infectious disease ang tatlo sa halos 60 ka mga indibidwal nga nagtambong sa ginpaimbestigaran nga derby sa Matina Gallera sa siyudad sang Davao sang bulan sang Marso.
Ang nasambit nga mga COVID-19 patient amo sanday PH 3268, PH 3269 kag PH3272 nga nagikan sa probinsiya sang South Cotabato, North Cotabato kag Sultan Kudarat.
Sa interbyu sang Bombo Radyo Koronadal kay North Cotabato 2nd District Board Member Philbert Malaluan, isa ka 45 anyos nga lalaki si PH4272 nga gikan sa banwa sang Midsayap nga nagtambong sa bulang nga nagluntad sa siyudad sang Davao sang Marso 6 tubtob 12 kun diin naglab-ot sa 56 ang kaupod sini kag tatlo lamang ang nakitaan sang malala nga sintomas.
Samtang si PH 3268 ang isa ka 56 anyos nga lalaki gikan sa Banga, South Cotabato kag ikaduha nga kumpirmado nga kaso sang COVID sa probinsiya.
Suno kay Banga Mayor Albert Palencia, ang nasambit nga pasyente ang yara na sa estable nga kondisyon sa subong kun diin ang duha nga nakaupod sini ang wala man sang may nakit-an nga sintomas.
Apang, nagapanawagan sa gihapon ang IPHO-South Cotabato sa mga nakatambong sa nasambit nga derby nga makig-angot sa ila tagsa ka mga Barangay Health Workers.
Sa subong nagsaka na sa 15 ang kumpirmado nga kaso sang COVID sa Rehiton Dose samtang napuli naman ang PUI nga napatay kun diin 3 ka bulan nga lapsag ang pinakabata nga biktima.
