KORONADAL CITY – Ginapangita na sa subong sang Integrated Provincial Health Office (IPHO) South Cotabato ang mga pumuluyo sa probinsya nga posible nga nagtambong sa isa ka religious gathering sa Malaysia.
Suno kay South Cotabato Provincial Health Officer Dr. Rogelio Aturdido Jr., magapakig-angot sila sa pila ka mga “Imam” ukon Muslim leaders sa probinsya.
Tinutuyo sini nga masiguro nga indi na maglapta pa ang ginakabalak-an nga coronavirus disease 2019 sa bug-os nga South Cotabato.
Ini makaligad natukiban sa Cotabato City ang pagpositibo suno pa sa COVID-19 sang isa ka taga Lanao Del Sur nga kalakip sa mga nagtambong sa nasambit nga religious gathering.
Ginmandoan man ni Aturdido ang mga Barangay Health Emergency Teams nga pahugtan pa ang monitoring sa mga pumuluyo nga bag-o lamang nag-abot sa ila lugar.
Samtang, nagpaandam naman si Aturdido nga mahimo pagakasuhan ang sin-oman nga magabayolar sa 14-day quarantine period sang gobyerno batok sa COVID-19.
