KORONADAL CITY – Tubtob sa subong indi gihapon makapati ang mga fans ni Kobe Bryant sa wala ginalauman nga kamatayon sini.
Sa ekslusibo nga interbyu sang Bombo Radyo Koronadal kay Charles Nelson, 62 anyos, residente sang California apang nagapuyo na diri sa Koronadal City kaupod ang iya Pilipina nga asawa, sa pagpati niya lahog lang ang balita nga patay na si Kobe, kag nakibot siya sang makit-an nga matood ang nasambit nga balita paglantaw niya sa computer.
Suno kay Nelson, indi siya gihapon makapati sa masubo nga nadangtan sang the Black Mamba labi pa nga ginsundan sini ang karera sini humalin pa sang highschool pa ini.
Ginlaragway naman sini nga “one of the greatest of all time” kag indi suno pa malimtan ang legasiya ni Bryant.
Madamo man nga mga netizens, fans, kag basketball icons ang nagpahayag sang ila pagpangasubo sa pagkapatay sang 41 anyos nga NBA legend.
Napatay si Kobe kaupod ang iya bata nga si Gianna samtang pakadto kuntani sa isa ka sports academy nga nagapatigayon sang youth basketball tournaments sang nagtibusok ang ginasakyan sini nga private chopper sa bahin sang Calabasas, California.
