KORONADAL CITY – Personal nga nagpadulong sa waragwagan sang Bombo Radyo Koronadal ang kapin 40 indibidwal nga nangin biktima sang panibag-o nga investment scam nga naka-base sa General Santos City.
Suno kay alyas Leo sa interbyu sang Bombo Radyo Koronadal, isa siya sa mga nabiktima sang Charity Act Good Trading investment scheme nga ginapamunoan sang isa ka pastor Bernie Bautista kun sa diin nakapain ini sang kapin P100,000 nga investment.
Ginbuyagyag man sini nga madamo sa iya mga kaupdanan nga biktima man sang nasambit nga scam ang ginbaligya ang ila mga kasapatan kag propedad sa pagpati nga mas doble ang ila makuha diri.
Ginpasiguro man suno pa sa ila nga ‘money back company guarantee’ ang nasambit nga scam apesar magsirado pa ini.
Dugang ni alyas Leo, nakumbinsi sila nga mag-invest bangud suno pa sa mga ginpakita nga dokumento sang kumbyohan kasubong sang SEC registration, business kag mayor’s permit.
Apang wala sila sang may nakuha nga kwarta humalin sang nagkadto sila sa nasambit nga kumbyohan sadtong Marso tubtob Setyembre 2019.
Nagapanawagan ang mga ini nga kuntani buligan sila sang gobyerno nga mabalik ang ila gin-invest nga kwarta.
