KORONADAL CITY – Padayon ang pagdagsa sang mga bulig sang mga concerned citizens halin sa nagkalain-lain nga bahin sang pungsod agud mahatagan sang ayuda ang mga apektado sang pag-alburuto sang bulkang Taal.
Apang sa pihak sini, nagapadayon man ang panawagan sang mga residente sa pagpangayo sang ila panginahanglanon.
Ginpahayag ni Jem Irise Rea sang Lipa City, Batangas sa ekslusibo nga interbyu sang Bombo Radyo Koronadal, nga madamo na nga mga pumuluyo ang nagbakwit sa mga buluthoan sa Brgy. Bulaklakan, Halang, Tagbaking kag Bagong Pook.
Kadam-an suno pa sa masobra 300 ka mga evacuees ang naghalin sa mga banwa sang San Nicolas, Talisay, Lemery kag sa Lipa.
Pag-abot naman sa relief items, ginpakigbahin ni Rea nga wala sila ginakulang sa pagkaon, apang hugot nga ginapanawagan sang mga apektado nga mga pumuluyo ang mga underwear, gatas para sa mga lapsag kag beddings, mangin man ang mga bulong labi na nga madamo ang ginaubo kag ginasip-on tuga sa epekto sang abo.
Gani nagapanawagan ini sa kun sin-oman nga magbulig nga mahimo ihulog lamang sa ila city hall kag bahala na ang mga local officials nga ipanagtag ini sa mga apektado nga mga residente.
