KORONADAL CITY – Amat-amat na nga nagaayo ang sitwasyon sa pila ka lugar sa Batangas makaligad nagbubo ang abo halin sa bulkang Taal humalin sang naglupok ini.
Ini ang ginpahayag ni Nestor Salivio nga residente sang Lipa City, Batangas sa interbyu sang Bombo Radyo Koronadal.
Suno kay Salivio, nagaayo na ang ila sitwasyon kumpara kahapon kun sa diin tuman kadulom sang dalan bangud sa abo kag wala sang nagabyahe nga mga salakyan.
Samtang, wala suno pa sang problema sa ila lugar ang pagpanagtag sang N95 masks.
Apang suno naman kay Lora Carnaje Farnazo sang Dasmariñas, Cavite nagakaubosan na sang face masks bangud sa kadamol sang abo sa ila lugar.
Gindugang man sini nga nakakinot sila sang tatlo ka sako sang abo makaligad gintinloan nila ang ila pa lamang nga garahe.
Sa pihak sini, ginpasiguro naman niya sa iya mga himata sa banwa sang Norala, South Cotabato nga yara sila sa luwas nga kahimtangan.
Nahibaloan nga pila sa mga lugar sa probinsya sang Batangas ang wala sang suplay sang kuryenga kag nagapanginahanglan sang relief goods.
