KORONADAL CITY- Nakapreso na suno pa subong ang mag-asawa nga Kuwaiti nga amo ang ginatudlo nga nagpatay Pinay OFW nga taga-South Cotabato sa pungsod Kuwait.
Ini ang ginkumpirmar ni Overseas Workers Welfare Administration (OWWA-12) Administrator Hans Cacdac sa esklusibo nga interbyu sang Bombo Radyo Koronadal.
Suno kay Cacdac, ang impormasyon nga ini ang resulta sang pagpakisapol ni ni Department of Labort and Employment ukon DOLE Sec Silvestre Bello III kag sang Kuwaiti Ambassador sa Pilipinas.
Ginpasiguro man suno pa sini sa gobyerno sang Pilipinas kag sa pamilya sang biktima nga pormal nga kasuhan sa korte ang mag-asawa nga employer ni Jeanelyn Villavende, 26-anyos kag residente ng Brgy Tinago, Norala, South Cotabato.
Samtang, nagagwa sa imbestigasyon sang DOLE, mismo ang amo nga lalaki ni Jeanelyn ang nagdala sa iya sa ospital apang gindeklarar nga dead on arrival.
Ginbuyagyag man suno pa sang lalaki nga amo nga ang asawa sini ang nagpatay sa Pinay OFW.
Sa pihak sang pag-ako sini, indi sa gihapon sya lusot sa ginapatigayon nga imbestigasyon.
Sa subong, magalab-ot suno pa sa 6 tubtob 7 adlaw ang imbestigasyon sa kaso kag diri palang posible nga makapauli ang bangkay sang biktima.
Indi man suno pa pagpabay-an sang gobyerno nga indi mahatagan sang hustisya ang makahananusbo nga gindangatan ni Jeanelyn sa kamot sang iya mapintas nga mga amo.
