KORONADAL CITY – Nagaapela si Koronadal City Firecrackers and Pyrotechnics Association president Johmel Alo nga magbakal lamang sa lehitimo nga mga stall sang palupok agud nga malikawan ang risgo sa pagkapilas sang palupok sa pagsug-alaw sa bag-ong tuig.
Kaangot sini, nagapanawagan man ini sa katawhan nga likawan ang pagbakal sang mga palupok nga wala natalana sa designated area sa bahin sang Prk. Malipayon, Brgy. Sto Nino bangud sila ang lehitimo nga nagabaligya sa nasambit nga pwesto.
Samtang ginpakigbahin man sini nga apesar naga-window shopping pa ang pila sa mga pumuluyo nga nagapundo sa ila lugar, wala man sila nagapatumbaya sa pagpahibalo sa mga pagpahanumdom kag paandam angot sa pag-usar sang palupok.
Magluwas sini, ginpasiguro man ang kaluwasan sang katawhan mangin sang mga manugbaligya bangud naka-standby sa tagsa ka stall ang mga fire extinguisher, tubig kag balas agud matapna ang insidente sang sunog nga mahimo magluntad sa nasambit nga area.
