KORONADAL CITY – Wala nagadula ang paglaum sang pamilya Maravilla nga magadampig sa ila ang hustisya makaligad ang nagluntad nga Maguindanao Massacre sang Nobyembre 2009 nga nagbilin sang madamo nga patay ilabi na sa mga katapo sang media.
Pahayag ini ni Jan Chienne Maravilla, bata sang isa sa mga biktima sang masaker nga si former Bombo Radyo Koronadal Chief of Reporters Bombo Bart Maravilla sa pihak sa nangin desisyon sang Supreme Court nga tugutan si Quezon City Regional Trial Court (RTC) Judge Jocelyn Solis Reyes nga maka-angkon sang 1 month Extension antes ipagwa ang pagpamatbat sa kaso.
Sa esklusibo nga interbyu sang Bombo Radyo Koronadal sa bata-on nga Maravilla apisar nga dismayado sila sa nangin tikang ni Chief Justice Diosdado Peralta nga tugutan ang nasambit nga postponement sang promulgation sang kaso, pagahulaton sa gihapon nila ang resulta bangud hugot ang ila nga pagpati nga malab-ot nila ang hustisya kadungan sang 10th year Anniversary sang nasambit nga masacre.
Samtang, may mga nakahan-ay nga mga aktibidad para sa anibersary sang Maguindanao Massacre kasubong sang site visit, prayer rally kag candle lighting.
