KORONADAL CITY – Nabatyagan subong sa bug-os nga rehiyon ang bayanihan system matapos ang pagbinuligay sang nagkalain-lain nga mga ahensya sang gobyerno, opisyal, pribado nga kumbuyuhan, sikat nga personalidad kag mangin ang mga ordinaryo nga pumuluyo sa paghatag sang mga panginahanglanon sang mga bakwit.
Sa esklusibo nga interbyu sang Bombo Radyo Koronadal kay North Cotabato 2nd District Board Member Onofre Respecio, nagapasalamat ini sa tanan nga mga nagabulig sa ila nga probinsya matapos ang napagkit nga mga mabaskog nga mga linog kun sa diin madamo sang napatay, napilasan kag nadulaan sang trabaho kag puluy-an.
Ginpahayag man sini nga sa bulig nga ila nabaton, nabuhinan suno pa ang kabudlay kag trauma sang mga residente.
Sa pihak sini, panawagan sa gihapon subong sang mga survivors ang dugang nga suplay sang pagkaon, tubig, temporary shelter materials kag shelter kits kasubong sang tents bangud posible pa nga maglab-ot sang pila ka bulang ang pagpabilin sang mga ini sa mga evacuation centers sa North Cotabato.
Samtang bukas sa gihapon ang Provincial Government sang North Cotabato sa pagbaton sang nagkalain-lain nga donasyon para sa mga apektado nga residente makaligad ang asod-asod nga linog.
Suno kay Board Member Respecio, ginpahayag sini nga abri sa gihapon ang ila nga opisina sa pagbaton sang donasyon para sa mga pumuluyo.
Mahimo man suno nga makigkoordinar lamang sa ila nga opisina ukon sa nagkalain-lain nga ahensya sang gobyerno kun sino ang may luyag nga magbulig sa mga apektado nga mga pumuluyo.
Samtang, wala man suno pa nagapabaya ang lokal nga gobyerno sang North Cotabato agud nga mahatag ang panginahanglanon sang mga pumuluyo.
Sa karon, apela man sini nga magluwas sa mga bulig, kinahanglanan man nila ang pagpangamuyo nga kuntani indi na maliwat ang nasambit nga kalamidad bangud makaluluoy na ang mga residente.
