KORONADAL CITY- Nagsaka na sa masobra 200 ang napagkit nga aftershocks makaligad ang nagluntad nga Magnitude 6.6 nga linog.
Sa esklusibo nga interbyu sang Bombo Radyo Koronadal kay Office of the Civil Defense Region 12 Asst. Regional Director Jerome Barranco, ginpahayag sini nga nagapadayon ang ila nga monitoring sa mga apektado nga lugar sa rehiyon makaligad ang mbaskog nga linog.
Suno kay Barranco, dapat nga magpabilin nga kalmado apang alerto ang mga pumuluyo bangud lauman pa ang mga aftershocks.
Kaangot sini, posible pa madugangan ang halos 400 nga napagkit nga apektado nga tawo kun sa diin 5 ang kumpirmado nga napatay sa South Cotabato kag North Cotabato samtang madamo naman nga istruktura ang nakapagkit nga danyos bangud sa linog.
Nahibaluan nga sa 376 nga mga apektado, 372 diri ang pilason samtang 4 naman ang ginbawian sang kabuhi nga nanday:
Anghel Andi, 22 years old- residente sang Arakan, North Cotabato
Rene Boy Andi, 7 years old- residente sang Arakan, North Cotabato
Marichel Morla, 23 years old- nagadala- residente sang Tulunan, North Cotabato
Nestor Narciso, 61 years old, residente sang Brgy. GPS Koronadal City, Koronadal City
Melissa Morin, 25-anyos, residente sang Brgy Dumadalig, Tantangan, South Cotabato
Samtang 7 naman ka commercial building ang naka-angkon sang Crack sa Koronadal City; 2 ka edifesyo ang nasunog sa Gensan, naguba man ang Radio Room sang Smart Tower sa Brgy Pag-asa, Mlang, North Cotabayo; 3 ka building sa Makilala; 3 man ka Health Care Facilities ang naka-angkon sang damage nga ginalakipan sang:
Health center sang Brgy Hanuon, Lake Sebu SoCot
Health center sang Brgy Kalkam, Tupi, SoCot
RHU sang Pres Roxas, Cotabato
Magluwas sini, 49 man ka buluthuan ang apektado kag 4 ka public infastructure man ang naka-angkon sang guba nga ginalakipan sang
Tupi Public Market
Old Brgy Hall sang Brgy Kalkam
New Brgy Hall sang Brgy Kalkam
Maasim Municipal Hall sang Saranggani
Naka-angkon man sang landslide sa bahin sang Brgy Bitu-an, Tulunan kag Brgy Batao, Makilala, North Cotabato.
Sa karon, ginamonitor pa ang kabug-usan nga danyos nga ginbilin sang linog.
Prayoridad man sa karon sang ahensya ang pagtumod sang iban pa nga apektado nga lugar agud nga mahatagan na sang nagakaigo nga bulig.
