KORONADAL CITY- Nagapadayon sa karon ang assessment sang South Cotabato Provincial Disaster Risk Reduction and Management Office ukon PDRRMO sa kabug-usan nga danyos nga ginbilin sang mabaskog nga ula kag hangin nga nagresulta sa pagkaguba sang pila ka puluy-an sa probinsya.
Sa esklusibo nga interbyu sang Bombo Radyo Koronadal kay PDRRMO Operations and Warning Chief Rolly Doane Aquino, pila ka balay ang nagkaguba bangud sa mabaskog nga hangin kun sa diin yara sa halos 10 ka balay ang apektado sa Brgy Malaya kag Sitio Highway, Bo. 3 sa banwa sang Banga.
Suno kay Aquino, may mga puluy-an nga nawad-an sang atop bangud sa buhawi kag pila ka tindahan ang naguba bangud sa nagkalatumba nga kahoy.
Wala naman suno pa sang napagkit nga casualty bangud sa mabaskog nga hangin.
Sa karon, nagpalab-ot na sa pauna nga bulig ang PDRRMO sa mga apektado nga pamilya kag ginapinalisar pa ang report agud nga makapalab-ot sang shelter assistance sa mga ini.
