ISULAN, SULTAN KUDARAT– Patay ang ginapatihan nga Bomb courier samtang pilason naman ang upod sini sa nagluntad nga shootout sa National Highway Prk, Don Juan, Brgy. Kenram, Isulan, Sultan Kudarat.
Sa interbyu sang Bombo Radyo Koronadal kay Police Lt Col. Modesto Ferrer, hepe sang Isulan Municipal Police Station, is aka tawag gikan sa concerned citizen ang ila nga nabaton angot sa makaduluda nga hulag sang mga lalaki rason nga ila ini ginresponderan.
Suno kay Ferrer, sakay sa mga motorsiklo ang mga ini sang hinali na lamang nga ginpangluthang sang wala pa makilala nga mga armado.
Gilayon naman nga gindala sa Sultan Kudarat Provincial Hospital ang mga ini apang gindeklarar nga dead on arrival ang isa sa ila.
Narekober naman sang kapulisan ang isa ka Improvised Explosive Device o IED lakip na ang 2 bala sang cal. 45 pistol, 10 empty shell sang cal. 45 pistol kag 17 empty shell sang 9mm pistol subong man ang isa ka motorsiklo.
Sa subong, ginaistudyuhan pa sang PNP kun may kaangtanan ang mga bomb couriers nga ini sa plano nga liwat nga pagapasigabong sang bomba sa nasambit nga banwa kag sang nagligad nga explosion sang Sabado nga nagbilin sang 8 ka pilason.
