Ginpaklaro ni Isulan PNP chief of polce Lt. Col. Joven Bagaygay nga ginahulat pa nila ang resulta sang post-blast investigation kasunod sang nagluntad nga pagpamomba sa public market sa nasambit nga banwa nga ginkapilas sang walo ka tawo.
Suno kay Bagaygay, ginahulat pa nila ang resulta sang EOD team kun ano nga component sang IED ang gin-usar, mangin man ang resulta sang imbestigasyon sang Special Investigation Task Group.
Indi man siya makahatag sang komento angot sa ginpaguwa nga pahayag sang Wesmincom nga posible ang BIFF-Abu Toraife group ang ginatudlo nga responsable sa nasambit nga pagpamomba.
Gindugang man sang police official nga balik na sa normal ang sitwasyon makaligad ang pagpamomba, apang nagapabilin sa gihapon ang kahadlok sa mga tawo.
Apang ginpasiguro man sini nga may mga countermeasures sila nga ginahimo agud nga mabatoan ang anuman nga tikang sang mga terorista nga nagapakuno-kuno bilang sibilyan kag magsulod sa ila banwa agud maghimo sang kalakasan..//
Samang, ginpaathag ni Bagaygay nga nakaguwa na ang halos tanan nga mga pilason sa nagluntad nga pagpamomba sa Isulan public market kun sa diin yara sa walo ang napagkit nga pilason.
Dugang ni Bagaygay, pito sa ila ang gindeklarar na nga outpatient samtang padayon nga nagapaayo sa balay bulolngan si Niño Virgo makaligad maigo sang shrapnel sa iya nga liog, dughan kag butkon.
Kadungan sini, nagapangabay man ini sa publiko sa iya nasakupan nga makig-angot sa mga otoridad agud indi na maliwat ang natabo nga pagpamomba sa Brgy. Kalawag 3.
